Мэдээ мэдээлэл (361/380)

2019 онд аймгийн төсвийн орлогыг 50,9 тэрбум байхаар баталсан бөгөөд оны эхний 9 сарын байдлаар 35,1 тэрбумд хүрчээ. Тус аймагт 2017-2019 онд нийт 41,4 тэрбум төгрөгийн хөрөнгө оруулалт хийснээс боловсрол болон эрүүл мэндийн салбарт түлхүү зарцуулагдаж, олон төрлийн бүтээн байгуулалт шинээр хийсэн. Хөрөнгө оруулалт нэмэгдэхийн хэрээр аймаг орон нутгийн эдийн засгийн бүхий л үзүүлэлтүүд ч дагаад өссөн дүнтэй байгааг онцлов.
Мөн сүүлийн хоёр жилд бэлчээр ашиглалтыг нэмэгдүүлэх чиглэлээр онцгойлон анхаарч отрын бүс нутгийг чөлөөлөх, экспорт болон арилжааны чиглэлээр хадлан хадахыг хориглосон зэрэг нь ихээхэн үр дүнтэй ажил болж, бусад аймагт туршлага болохуйц ажил болсныг ч тодотголоо. Цаашид Сүхбаатар аймаг дангаараа бус бүс нутгаараа хөгжих учиртайг хэлээд, Ерөнхий сайд У.Хүрэлсүхээс Хөөт-Бичигтийн чиглэлд 216 км төмөр зам барих, Баруун-Урт–Бичигтийн чиглэлийн 272 км авто зам тавих, Бичигт боомтыг хөгжүүлэх гэсэн гурван томоохон ажилд онцгойлон анхаарч, дэмжлэг үзүүлэхийг хүслээ.
Харин Ерөнхий сайд У.Хүрэлсүх аймаг орон нутгийн ажил өнгөтэй, өөдрөг байгааг сайшаагаад хамгийн гол нь төрийн албан хаагчид сахилга баттай, хариуцлагатай байхыг анхаарууллаа. Төрийн алба гэдэг хөнгөн шуурхай, хариуцлагатай, цаг хугацаатай байх ёстой. Төрийн ажлыг хийдүүлдэг, ажил хийсэн дүр эсгэдэг байдалтай байж болохгүй. Төрийн хүн бол төр, ард түмэнд үйлчлэх үндсэн үүргээ ямагт ухамсарлаж бай гэдгийг ерөнхий төрийн алба хаагчдад захиж байлаа.